विराटनगर,१७ चैत ः युवतीलाई क्रिकेट खेलप्रति उत्साह एवं खेल्न प्रेरणा दिनका लागि नेपाल क्रिकेट फाउण्डेशनले चौथो संस्करणको ‘इक्युवालिटि कप टि २० क्रिकेट–२०२५’ प्रतियोगिता चैत १८ गतेदेखि विराटनरमा आयोजना गर्न लागेको छ ।
फाउण्डेशनद्वारा आज यहाँ आयोजित पत्रकार सम्मेलनमा प्रतियोगिता विराटनगर –६ स्थित म्यारिलिबोन ज्वाला क्रिकेट मैदानमा हुने जानकारी गराएको छ ।

फाउण्डेशनका संयोजक मन्दिप साहका अनुसार प्रतियोगितामा कोशी प्रदेशका मोरङ र इलाम तथा मधेस प्रदेशका सिरहा र सप्तरीका महिला टिमहरू सहभागी हुनेछन् ।
चार टिमहरूबीच लिगको आधारमा प्रतिस्पर्धा हुनेछ ।
सोमबार दुई खेल हुनेछ । पहिलो खेल इलाम र सप्तरी बिच हुनेछ भने सोही दिन हुने दोस्रो खेल मोरङ र सिरहाबीच हुनेछ ।

फाउण्डेशनले म्यारिलिबोन क्रिकेट क्लब फाउण्डेशन र क्रिकेट विथआउट बाउण्ड्रीजको सहयोगमा क्रिकेटमा महिलाको सहभागिता अभिवृद्धि अभियान अन्तर्गत ‘इक्युवालिटि कप’ आयोजना गर्दै आएको साहले बताउनु भयो ।

फाउण्डेसनकी बोर्ड सदस्य स्नेहा गुवाजुले नव प्रतिभा पहिचानलाई मद्दत गर्ने लक्ष्यका साथ आयोजना हुन लागेको प्रतियोगिताले यसअघि नै केही खेलाडी उत्पादनमा टेवा प¥याएको छ ।
मोरङमा सानु राजवंशी, निरु राजवंशी (काजल) र पूर्णिमा राजवंशीले अन्तर्राष्ट्रिय, राष्ट्रिय,प्रदेशस्तरीय खेल्न समक्ष भएको उदाहरण उहाँले प्रस्तुत गर्नुभएको थियो ।

फाउण्डेशनले सानै उमेरका बालिका तथा युवतीहरूलाई क्रिकेटको प्रशिक्षणदेखि लैङ्गिक संवेदनशीलता सम्बन्धी कार्यशाला पनि सञ्चालन गर्दै आएको छ ।

प्रतियोगिता लिग चरणमा ६ र फाइनल सहित जम्मा ७ वटा खेल हुनेछन् ।–––